निलेश मोरे
“उजनी आमच्या हक्काची, नाही कुणाच्या बापाची!”, “ठेकेदारी पद्धत रद्द करा!”, “सौरऊर्जा प्रकल्प रद्द करा!” अशा जोरदार घोषणांनी सोमवारी पाळदेव येथील उजनी परिसर दणाणून गेला. ठेकेदारी पद्धत आणि प्रस्तावित सौरऊर्जा प्रकल्पाच्या विरोधात स्थानिक मच्छीमारांनी आक्रमक होत जलसमाधी आंदोलन केले.
गेल्या महिन्यात सोलापूर येथे आंदोलन करूनही प्रशासनाकडून ठोस तोडगा न निघाल्याने मच्छीमारांमध्ये मोठा असंतोष निर्माण झाला होता. सोमवारी सकाळी ११ वाजता आंदोलनाला सुरुवात झाली. प्रशासनाकडून लेखी आश्वासन मिळत नसल्याने आंदोलकांनी दुपारी थेट उजनीच्या पाण्यात उतरून आंदोलन अधिक तीव्र केले.
सुमारे दोन तास आंदोलक पाण्यात राहिल्याने दोन महिला बेशुद्ध पडल्या. या घटनेमुळे आंदोलनस्थळी काही काळ तणावाचे वातावरण निर्माण झाले. दरम्यान, पोलिसांचा मोठा बंदोबस्त तैनात करण्यात आला होता. आंदोलकांना पाण्यात जाण्यापासून रोखण्याचा पोलिसांनी प्रयत्न केला; मात्र मच्छीमार आपल्या मागण्यांवर ठाम राहिले.
“ठेकेदारी पद्धत आणि सौरऊर्जा प्रकल्प रद्द करण्याबाबत लेखी आश्वासन मिळाल्याशिवाय माघार घेणार नाही,” अशी भूमिका आंदोलकांनी घेतली. अखेर दुपारी आंदोलन मागे घेण्यात आले. मात्र, मागण्यांबाबत ठोस निर्णय न झाल्यास आंदोलन पुन्हा तीव्र करण्याचा इशारा मच्छीमारांनी दिला आहे.
