रंगीबेरंगी रोषणाईने मंदिराच्या भव्य शिखरासह ऐतिहासिक दीपमाळांचे सौंदर्य खुलले; दर्शनासाठी भाविकांची गर्दी
(निलेश मोरे)
श्री क्षेत्र राशीन (ता. कर्जत) येथील कुलस्वामिनी श्री जगदंबा देवी मंदिरात नवरात्रोत्सवानिमित्त करण्यात आलेल्या आकर्षक विद्युत रोषणाईने संपूर्ण मंदिर परिसर उजळून निघाला आहे. रंगीबेरंगी दिव्यांचा लखलखाट, मंदिराचे भव्य शिखर आणि ऐतिहासिक दीपमाळांची मनमोहक सजावट यामुळे मंदिर परिसराला आगळेवेगळे धार्मिक आणि उत्सवी स्वरूप प्राप्त झाले आहे.
नवरात्रोत्सवाच्या पार्श्वभूमीवर मंदिर व्यवस्थापन, उत्सव मंडळ आणि ग्रामस्थांच्या सहकार्याने मंदिर परिसरात विशेष सजावट करण्यात आली आहे. विविध रंगांच्या विद्युत दिव्यांनी सजलेले मंदिर भाविकांचे लक्ष वेधून घेत असून, रात्रीच्या वेळी या रोषणाईचे सौंदर्य अधिकच खुलून दिसत आहे. संपूर्ण मंदिर परिसरात भक्तिमय आणि उत्साहपूर्ण वातावरण निर्माण झाले आहे.
श्री क्षेत्र राशीन येथील श्री जगदंबा देवी मंदिराला धार्मिक आणि ऐतिहासिक महत्त्व आहे. नवरात्रोत्सवाच्या काळात देवीच्या दर्शनासाठी विविध भागांतून भाविक राशीनमध्ये दाखल होत असतात. यंदाही उत्सवाच्या निमित्ताने मंदिर परिसरात आकर्षक विद्युत रोषणाई करण्यात आली असून, देवीच्या दर्शनासोबतच ही मनोहारी सजावट पाहण्याची संधी भाविकांना मिळत आहे.
नवरात्रोत्सवानिमित्त मंदिरात विविध धार्मिक व सांस्कृतिक कार्यक्रमांचे आयोजन करण्यात आले आहे. देवीच्या दर्शनासाठी येणाऱ्या भाविकांमध्ये उत्साहाचे वातावरण असून, भक्ती, श्रद्धा आणि परंपरेचा संगम राशीन नगरीत अनुभवायला मिळत आहे.
विद्युत रोषणाईने उजळलेले श्री जगदंबा देवी मंदिर सध्या भाविकांसाठी आकर्षणाचे केंद्र ठरत असून, नवरात्रोत्सवामुळे संपूर्ण राशीन नगरी भक्तिरसात न्हाऊन निघाली आहे.
